Ek Din ..

Ek din.....

Aaj baarish bahut hai.. arey seema jaraa darwaaza band karnaa... arey yeh kapde nhi sukhe abhi tak
kal kanpur jaana hai... koi dhang se kaam nhi karta.. bas mujhe akele hi sab dekhna padta hai !!

aur yeh puraane newspapers kaise padhe hai yahan...inhe kaun saaf karegaa...
yeh kya hai.. (ek panna jo gir gya.. aur uske haath mein aa gya)

"Bhula diye maine woh pal jab hum saath the aur mehakti thi hawaaon mein woh baatein

Bhula diye maine woh pal jab tum mere pass the aur mehsoos kar sakti thi main tumhari saansein

Bhula diye maine woh pal jab tum aate the aur tham jaate the mere kadam

Bhula diye maine woh pal jab tum gaate the aur ruk se jaate the mere saare ehsaas

Bhula diye maine woh pal jab tumhari aankhon se sivaa kuch naa the meri duniya mein aur har jhalak pe doob jaaya karti thi main

Bhula diye maine woh pal jab hum do nhi ek hua karte the aur bas pyaar hi pyaar hotaa tha

Bhula diye maine woh pal jab kehne ko bahut kuch hota tha par rik jaate the mere hoth tumhari hasi dekh kar

Bhula diye maine woh pal jab main tumhare sapne dekhti thi aur jeena chahti thi main tumhare saath apna kal

Bhula diye maine woh pal, woh tumhara ehsaas, woh tumhari muskurahat,
woh tumhari baatein,woh tumhari saasein bas bhula naa paayi to woh KAL jo tum mujhe de gaye.... "

Tabhi ek 5 saal ka ladhka khelta hua aaya aur bolaa" Maa!! kya kar rahi ho??"
Aur woh bas itna hi keh paayi " kuch nhi betaa.. kuch puraani yaadein saaf kar rahi hun"